Gabaygan ayaa ah gabay murti badan laga dheehan karo isla markaana sarbeeb badan ay ku jirto
Haday taladu kaa siibatoo marrinka aad seegto
Saldhigeeda xaajadu haday kugu sakiirawdo
Adoo eeda saanyadey hadaad saxi aqoon weydo
Xaajada rag saafiyo hadaan odaya loo soocin
Haday waaya sii socoto waa lala sureeraaye
Sanahaabo goortay dhacdaa lal salcaamaaye
Markay godobtu sedarka u gasho saac wareen mudane
Kala soocantoo maalintaa layska kala soofye
Saansaanka ii muuqda waa seben colaadeede
Duufanadu ninkii ay sitaan waa sabayn jiraye
Intaan sababta geeridu ku iman gebi ka sayraarye
Goortuu xunbada sacab ku dhigo moodyey saacidoe
waxaan nabadi sugin baan colaad lagu salaaxayne
Nina kuma samaadoo nafluhu kuma siraataane
Soo joog nin laga waayeyoow seexashaa xigiye
Ardaalnimo sacabsaday garasho seegtaaye
Inta uu sudkiisii dab sudho hulucna sii saarye
Dabkii seexan waayaa naflaha waa sakalayaaye
Inay saatan dhaantiyo wanaag waa ka saahidaye
Siximada kuwii fuulayoo saabka ka coloobey
Iyagoon salaantiyo wejiga midi mid siinaynin
Inaysan samatabixin baa midkood saatir haybsadaye
Mana garan inaw siman yihiin saymahaa dhiciye
Ragii surinka miinada dhigee saancadaha keenay
Oo sebeno boraanta qoday siriqna qoolaayey
Ee si aan haboonayn faloo dabinka seeraayey
Suryadey dhigeen baa ridoo goysey seedahae
Wax sidaa ka dhigan baa arkoo lay sawirayaaye
Ninkii samaha diidaw waxaad saadsataad heliye
Nin colaad u sacabaynayaa yeedhi siidhigae
Mar hadaanu suurayn karayn say hadhow noqone
Talo xumo nimay sahansatow soo gal hay odhane
Nin walboo masuul sare noqdaa eedu sadataaye
Mar haduu maqaar saar batiyo weel sisibadeede
In la saanto daayoo wallaan xili u saarnayane
Horu socod ma muuqdiyo inay gaadho heer sare e
Waa dhagax sayaxay oo kaloo aan salkii qoyine
Sacab tima le weeyaan ninkii guul ka sugayoe
Iminkana sakiin miridhay baa laysku sarayaaaye
Inuu saayid kuu soo kordhaa kama sugaysaane
Sirahaa shisheeyuhu watey duub u sidataaye
Waxba haygu sacabayn ninkii suuban filayowe
Sidatani si maahee intuu saxalku meeraayo
Sinaan iyo cadaaladi intay samada meerayso
Haw suuldhabaalayn ninkii sii sasabayowe
Anaa saamigaa liyo anaa saanadow ridae
Anaa seefta daabka u hayoo kuu siyaasiyae
Inta xaalku saa uu ku jiro waad siloon tahaye
Hankeenii sareeyiyo qabkii saaka waa jabaye
Ku karaama seegtoo nafluhu siidh xun kuu aragye
Sumcad iyo waxay sharaf lahayd waad sagootidaye
Inta ay sidii nacabku rabo wada samaynayso
Inta ay sinyoorow hayaan sun iyo waabayda
Inta cadawgu soofaynayoo amarka siinaayo
Inta ay sirdoonka u yihiin niman sunuud qaata
Maan gaab sawaab iyo intay doqonta saayeyso
Sahal maaha soomaalinimo inay saraysaaye
Abwaan Mataan
Mataan01@hotmail.com
Republished by :
Baargaal Net
