Markab xamuul ah, oo ka yimid waddanka Imaaraatka Carabta, kuna socday dekedda magaalada Muqdisho, ayaa dabayl xooggan ku haleeshay xeebta badweynta Hindiya ee bariga Puntland.
Markabkan ayaa dabaysha la kulmay, xilli uu marayay xeebta degmada Baargaal ee Gobolka Gardafuu.
Booliiska degmada Baargaal oo gurmad u sameeyay markabka, ayaa soo badbaadiyay dhammaan shaqaalihi saarnaa, kuwaas oo qaarkood ku dhaawacmeen dabaysha.
Dhaawacaha shaqaalaha ayaa haatan lagu dabiibayaa xarunta caafimaadka degmada Baargaal, waxaana dhaqaatiirtu sheegeen in ay dhaawacyo fudud qabaan.
Puntland ayaa maalmahan ka digaysay roobab dabayl wata oo ku soo wajahan xeebaha Gobollada Bari iyo Gardafuu, iyadoo ku baaqday in laga baxo xeebaha iyo dhulka godan.
