Xulka dayarta qaranka Soomaaliya ayaa ku guuleystay koobka Bariga iyo Bartamaha Afrika kadib guul weyn oo ay ka gaareen xulka dayarta South Sudan.
Soomaaliya ayaa bilowga cayaartay la hormatay gool uu dhaliyey Cabdixafiid oo ahaa cayaaryahankii dhaliyey goolkii guusha ee kulankii hore, waxaana qeybta hore ee cayaarta lagu kala nastay 1-0 oo ay Soomaaliya ku hogaaminaysay.
Qeybta labaad ee cayaarta xulka South Sudan ayaa iska soo guday goolkii lagu lahaa waxayna cayaarta ka dhigeen barbardhac.
Daqiiqado kadib xulka dayarta qaranka Soomaaliya ayay u suurta gashay inay dhaliaan goolkii labaad ee cayaarta, waxaana shabaqa ku hubsadau Cabbdiraxiim Muxiyaddiin Daahir oo ah xidigga Soomaaliya uga cayaarayey booska weeraryahanka
Isla Cabbdiraxiim Muxiyaddiin Daahir ayaa daqiiqado kadib Soomaaliya u dhaliyey goolkii seddexaad oo ahaa mid si weyn looga soo shaqeeyey wadnaha jaray taageerayaasha iyo xidigaha xulka South Sudan maadaama rajadooda ay ceel ku dhacday.
Cayaarta ayaa ugu dambeyn kusoo dhammaatay 3-1 waxaana sidaas koobka ku qaaday xulka qaranka Soomaaliya taasoo farxad weyn u ah Soomaaliya.
Xulka dayarta Qaranka Soomaaliya ee ka yar 17 ayaa la filayaa inay berri kasoo dagaan garoonka diyaaradaha Aadan Cadde halkaas oo loogu sameyn doono soo dhaweyn weyn.
