Dagaal u dhexeeya maleeshiyaadka SNM ee Somaliland sheegta iyo xoogagga Daraawiishta xaq u dirirka SSC ayaa ka socda duleedka Laascaanood.
Maleeshiyaadka Somaliland ayaa sida wararku sheegayan weeraray ciidamada difaaca SSC ee ku sugan Laascaanood.
Balse Ciidamada degaanka ayaa iska difaacay duullaanka Taliska Muuse Biixi waxaana maleeshiyaadka Somaliland lagu jebiyay saddex aag sida xogaha lagu helayo.
Ciidamada SSC ayaa la sheegaya in ay gacanta ku dhigeen hub iyo gaadiid dagaal oo ay ku jiraan tekniko ah
Khasaaraha dhimashada iyo dhaawaca labada dhinaca weli faahfaahin sugan lagama hayo waxaana weli socda dagaalka.
Dagaalka ayaa si gaar ah uga dhacay bariga Laascaanood, kadib markii ay isku dayeen Maleeshiyaadka SNM ee Somaliland sheegta inay soo galaan magaalada, waxaana ka hortagay ciidamada xaq u dirirka Deegaanka.
Wararka ayaa sheegaya in dagaalka uu saacado qaatay, isla-markaana weli rasaas teel-teel ah laga maqlayo qaybo kamid ah magaalada.
Xaaladda ayaa weli ah mid aad u kacsan, waxaana lasoo warinayaa inuu jiro khasaare dhimasho iyo dhaawacba leh oo ka dhashay dagaalka u dhexeeya labada dhinac.
Si kastaba, Maleeshiyada SNM ee Somaliland ayaa dagaal soo qaaday , ayada oo la filayo in go’aanno culus oo ka dhan ah Somaliland ay soo saaraan waxgaradka SSC ee haatan ku shirsan gudaha Laascaanood.
